بےحسی کی لذت

بےحسی کی لذت

کالم از: سر جاوید بشیر

میرے محترم بھائی کی فرمائش پر یہ کالم لکھ رہا ہوں۔ وہ بھائی، جو خود ایک درد مند دل کے مالک ہیں، آج کی تحریر بھی اسی درد، اسی کرب اور اسی سچائی کا عکس ہے جو ہمارے معاشرے کے ہر ذرے میں بکھری ہوئی ہے، مگر ہم نے آنکھیں بند کر رکھی ہیں۔

کچھ لمحے کے لیے آپ کو پچھلی صدی کی طرف لے چلتا ہوں۔ یہ 1964 کا سال تھا، نیویارک کی ایک رات، جب "کیٹی جینوویس" نامی ایک لڑکی پر حملہ ہوا۔ وہ مدد کے لیے چیختی رہی، آوازیں دیتی رہی، قریب کی عمارتوں میں درجنوں لوگ بیدار تھے، کھڑکیوں سے سب کچھ دیکھ بھی رہے تھے، مگر کسی نے دروازہ نہیں کھولا، کسی نے فون نہیں اٹھایا۔ وہ لڑکی تڑپ تڑپ کر مر گئی، اور لوگ صبح تک سکون کی نیند سوتے رہے۔ دنیا نے پہلی بار اس رویے کو ایک نام دیا: Bystander Effect۔ یعنی وہ کیفیت جب لوگ سب کچھ دیکھ کر بھی ان دیکھا کر دیتے ہیں۔

آج ساٹھ برس بعد پاکستان کی گلیاں اور کوچے اسی کہانی کا ایک بدتر عکس ہیں۔ چند دن پہلے ہی دو بھائیوں کو سرِعام قتل کیا گیا، ہجوم موجود تھا، کیمرے آن تھے، موبائل فونز کی آنکھیں پوری طرح کھلی ہوئی تھیں، مگر انسانوں کی آنکھیں بند تھیں۔ جو رک سکتا تھا، وہ ویڈیو بناتا رہا، جو بچا سکتا تھا، وہ "لائکس" کے خواب دیکھتا رہا۔ وہ لمحہ ایک سوالیہ نشان بن کر ہماری اجتماعی پیشانی پر لکھ دیا گیا کہ ہم کس نسل کے وارث ہیں؟

یہ وہی کیفیت ہے جسے ماہرین "Inattentional Blindness" کہتے ہیں۔ یعنی اردگرد سب کچھ ہوتا ہے، مگر انسان کا ذہن اور دل اندھے ہو جاتے ہیں۔ آپ اسے آسان زبان میں "بے حسی" کہہ لیجیے۔ لیکن یہ وہ بے حسی ہے جس میں اب لذت شامل ہو گئی ہے۔ ہاں، ہم لذت لینے لگے ہیں دوسروں کے کرب سے، دوسروں کے خون سے، دوسروں کی چیخوں سے۔

 کوئی ڈوب رہا ہو تو پہلے موبائل نکالا جاتا ہے۔ کوئی آگ میں جل رہا ہو تو شور مچانے کے بجائے ریکارڈنگ شروع کر دی جاتی ہے۔ کسی کی سانس بند ہو رہی ہو تو دوڑ کر مدد نہیں کی جاتی، بلکہ کہا جاتا ہے "یہ تو وائرل ہو گا"۔ یہ صرف بے حسی نہیں، یہ تو ایک نشہ ہے، وہ نشہ جو انسان کو انسانیت سے محروم کر دیتا ہے۔

آپ نے کبھی غور کیا کہ ہم جنازے پر بھی فوٹو کھینچتے ہیں؟ قبر پر بھی سیلفی بناتے ہیں؟ یہ کون سا کلچر ہے؟ یہ کون سی روش ہے؟ کبھی سوچا کہ جب ہم دوسروں کے غم کو بھی "کنٹینٹ" بنا دیتے ہیں، تو ہم اپنی روح کو کہاں بیچ دیتے ہیں؟

پرانے وقتوں کو یاد کیجیے۔جب کوئی گھر جلتا تھا تو محلہ بھر کے مرد بالٹیوں میں پانی بھرتے بھاگتے تھے۔ جب کسی پر ظلم ہوتا تھا تو لوگ جانیں خطرے میں ڈال کر مظلوم کے ساتھ کھڑے ہو جاتے تھے۔ آج وہ محلے مر گئے، وہ جذبے دفن ہو گئے، اور ان کی جگہ ایک چمکتی اسکرین نے لے لی۔

ہم ایک ایسی نسل بنا چکے ہیں جو یہ سمجھتی ہے کہ اگر کوئی لمحہ موبائل میں محفوظ نہ ہو تو وہ لمحہ بیکار ہے۔ ہم نے اپنے احساسات، اپنی ہمدردی، اپنا خوفِ خدا سب کچھ "گیگا بائٹس" کے فولڈرز میں قید کر دیا ہے۔ لیکن سوال یہ ہے کہ جب کل ہماری اپنی باری آئی تو کیا ہوگا؟ جب کل کوئی ہمارا بیٹا، بھائی، بیٹی یا ماں سڑک پر چیخ رہی ہو گی تو کیا ہجوم پھر ویڈیو بنائے گا؟ کیا ہم پھر "ہیش ٹیگ" کا انتظار کریں گے؟

یہی اصل خطرہ ہے۔ یہ بےحسی اگر آج نہ رکی تو کل ہماری کہانیاں بھی صرف موبائل کی سکرین پر فائلز بن کر رہ جائیں گی۔ ہم کتابوں میں نہیں، ہم تصویروں میں نہیں، ہم دعاوں میں نہیں، صرف "وائرل کلپس" میں یاد رکھے جائیں گے۔ اور وہ بھی چند سیکنڈ کے لیے، پھر کسی نئے حادثے کی ویڈیو ہمیں Replace کر دے گی۔

آپ سوچتے ہوں گے، اس کا حل کیا ہے؟ حل بڑا سادہ ہے، مگر عمل مشکل۔ آپ کو اپنے دل کی کھڑکیاں دوبارہ کھولنی ہوں گی۔ آپ کو یہ تسلیم کرنا ہوگا کہ موبائل ایک آلہ ہے۔ آپ کو یہ فیصلہ کرنا ہوگا کہ جب کوئی مدد مانگے تو ہاتھ بڑھائیں، نہ کہ لینز کھولیں۔ آپ کو یہ سوچنا ہوگا کہ جب کوئی خون میں نہا رہا ہو تو آپ کا فرض ہے کہ خون روکیں، نہ کہ تصویر بنائیں۔

یاد رکھیے، قومیں تبھی زندہ رہتی ہیں جب ان کے لوگ دوسرے کے دکھ کو اپنا دکھ سمجھیں۔ اگر آپ اپنے بھائی کے قتل پر خاموش رہیں، اگر آپ اپنی بہن کی بے عزتی پر ویڈیو بناتے رہیں، اگر آپ اپنی ماں کی چیخ پر تماشائی بنے رہیں تو پھر یقین مانیے آپ خود اپنی قبر کھود رہے ہیں۔

میری گزارش ہے کہ آپ ایک بار اپنے دل سے سوال کریں: اگر یہ ظلم آپ کے ساتھ ہوتا تو آپ چاہتے کہ لوگ ویڈیو بنائیں یا مدد کریں؟ 

خدارا، بےحسی کو عادت نہ بنائیے۔ خدارا، اس لذت کو زہر نہ بننے دیجیے۔ یاد رکھیے، موت ایک دن سب کو آنی ہے، لیکن سوال یہ ہوگا کہ آپ نے زندگی کس طرح گزاری؟ دوسروں کو بچا کر یا دوسروں کی ویڈیوز بنا کر؟

آج بھی وقت ہے۔ دل کی کھڑکیاں کھولیے۔ اپنے اردگرد دیکھنا شروع کیجیے۔ دوسروں کے درد کو محسوس کیجیے۔ کیونکہ اگر یہ سلسلہ یونہی چلتا رہا تو تاریخ ہمیں معاف نہیں کرے گی۔ ہم وہ قوم بن جائیں گے جو دوسروں کے زخموں پر مرہم رکھنے کے بجائے ان زخموں کو "کلپ" بنا کر دنیا کو دکھاتی تھی۔کاش! ہم جاگ جائیں، کاش ہم انسان بن سکیں، بس یہی ایک

 دعا ہے، یہی ایک پکار ہے۔