بارہ ربیع الاول کا پیغام

 بارہ ربیع الاول کا پیغام

کالم از: سر جاوید بشیر

یہ دن، 12 ربیع الاول، کوئی عام دن نہیں۔ یہ وہ لمحہ ہے جب اندھیروں میں روشنی آئی۔ جب یتیموں کا سہارا پیدا ہوا۔ جب عورتوں کو عزت ملی۔ جب غلاموں کو آزادی کی نوید ملی۔ جب کمزوروں کو ہمت ملی۔ اور جب انسانیت کو اصل انسانیت ملی۔ یہ وہ دن ہے جب رحمت کا دریا بہا اور دنیا کو اُس ذات کا تحفہ ملا جس کے اخلاق کے بارے میں خدا نے خود کہا کہ "بیشک آپ عظیم اخلاق کے مالک ہیں۔"

 وہ مبارک دن جب مکہ کی وادیوں میں خوشبوئیں پھیل گئی تھیں، جب کائنات کے چہرے پر مسکراہٹ آ گئی تھی، جب تاریکیوں میں روشنی کی کرن پھوٹی تھی۔ ہم مسلمان اس دن کو کیسے مناتے ہیں؟ ہم پہاڑیاں سجاتے ہیں، گلیوں میں رنگ برنگے قمقے لگاتے ہیں، نعت خوانی کے پروگرام کرتے ہیں، میلے لگاتے ہیں۔ یہ سب کچھ ہم محبت میں کرتے ہیں۔ مگر کیا ہم نے کبھی سوچا کہ محبت کا تقاضا کیا ہے؟

ہماری گلیوں کی روشنیوں کو دیکھ کر سوچتا ہوں، کیا اُس دن مدینہ کی گلیاں بھی اسی طرح قمقموں سے سجی تھیں؟ نہیں، وہاں دلوں کی روشنی تھی۔ وہاں آنکھوں کے آنسو تھے۔ وہاں زمین و آسمان جھوم اٹھے تھے۔ فرشتے خوشی سے نازل ہوئے تھے۔ درخت جھومے تھے۔ پرندے چہچے تھے۔ لیکن آج ہم نے اس دن کو ایک میلے کا دن بنا دیا ہے۔ کھانے پینے کے اسٹال، شور شرابہ، گانے بجانے کی آوازیں۔ یہ سب کچھ ہے، مگر اصل پیغام کہیں کھو گیا ہے۔

آج میرا ملک سیلاب زدہ ہے۔ یہ صرف پانی کا سیلاب نہیں جو گھروں کو بہا لے گیا، یہ نفرتوں کا سیلاب ہے جو دلوں کو بہا لے گیا ہے۔ یہ دوریوں کا سیلاب ہے جو رشتوں کو بہا لے گیا ہے۔ یہ سیلاب نظر تو نہیں آتا مگر پانی والے سیلاب سے زیادہ خطرناک ہے۔

اگر رسول اللہ ﷺ آج ہمارے بیچ ہوتے، کیا وہ یہ سب دیکھ کر خوش ہوتے؟ کیا وہ ان ڈانس مقابلوں پر مسکراتے؟ کیا وہ فوڈ اسٹریٹ کے شور کو جشن سمجھتے؟ نہیں، اُن کی آنکھوں میں آنسو آ جاتے۔ وہ ہمیں یاد دلاتے کہ میں اس لیے نہیں آیا تھا۔ میں تو اس لیے آیا تھا کہ دل نرم ہوں، کردار پاکیزہ ہوں، گھروں میں سکون ہو، چہروں پر سچائی ہو۔

آج گلیوں کو سجانے کی نہیں، دلوں کو سجانے کی ضرورت ہے۔

گلیوں کو سجانے سے انقلاب نہیں آئے گا، یہ انقلاب اس وقت بھی علم سے آیا تھا، آج بھی علم سے آئے گا۔

آج کھانے نہیں، کتابیں بانٹیں۔

آج نفرتیں نہیں، محبتیں بانٹیں ۔

آج ہم نے محفلِ میلاد تو سجا رکھی ہے مگر اپنے اخلاق کو برباد کر رکھا ہے۔

آج ہم نے راستوں پر قالین بچھا دیے ہیں مگر اپنے دلوں میں کانٹے بو دیے ہیں۔

آج ہم نے چراغاں تو کر دیا ہے مگر اپنے گھروں کے اندر اندھیرا کر دیا ہے۔

آج جب ہم بارہ ربیع الاول کا دن منا رہے ہیں، تو ہمیں اس بات کا عہد کرنا چاہیے کہ ہم اپنی زندگیوں کو علم کے نور سے روشن کریں گے۔ ہم اپنی سوچ کو مثبت بنائیں گے۔ ہم نفرتوں کو ختم کر کے محبتیں بانٹیں گے۔ ہم ایک دوسرے کا احترام کریں گے۔ ہم ایک دوسرے کے دکھ درد کو سمجھیں گے۔ اور سب سے اہم، ہم اپنے ملک کی تعمیر و ترقی کے لیے اپنا کردار ادا کریں۔

بارہ ربیع الاول کا پیغام یہ نہیں کہ ہم پہاڑیاں سجائیں اور پھر انہیں مٹا دیں۔ 12 ربیع الاول کا پیغام یہ ہے کہ ہم اپنے دلوں کو سجائیں اور پھر انہیں ہمیشہ کے لیے روشن کر دیں۔

آج ہمارے ملک کا حال دیکھیے۔ ہر طرف جہالت کا سیلاب ہے۔ ہر طرف نفرت کی آگ ہے۔ ہر طرف خود غرضی کا زہر ہے۔ کیا یہی وہ معاشرہ ہے جس کی تعلیم ہمارے نبی صلی اللہ علیہ وسلم نے دی تھی؟ کیا یہی وہ امت ہے جسے "خیر امت" کہا گیا تھا؟

بارہ ربیع الاول کا پیغام یہ ہے کہ ہم جہالت سے نکلیں۔ ہم تاریکی سے نکلیں۔ ہم نفرتوں سے نکلیں۔ ہم خود غرضی سے نکلیں۔ ہم وہ امت بنیں جس کی مثال ہمارے آقا صلی اللہ علیہ وسلم نے پیش کی تھی۔

ہمارے نبی صلی اللہ علیہ وسلم نے جو معاشرہ قائم کیا وہ علم پر مبنی تھا۔ وہ عدل پر مبنی تھا۔ وہ رحمت پر مبنی تھا۔ وہ محبت پر مبنی تھا۔ کیا ہم نے یہ معاشرہ قائم کیا؟ ہم نے تو اپنے آپ کو دھوکہ دیا ہے۔ ہم نے نعتیں پڑھیں، درود بھیجا، مگر عمل سے محروم رہے۔

آج ہمیں اپنے آپ سے سوال کرنا ہوگا: کیا ہم واقعی محمد صلی اللہ علیہ وسلم کے امتی ہیں؟ کیا ہمارے اخلاق وہ ہیں جو آپ نے سکھائے؟ کیا ہمارا معاشرہ وہ ہے جو آپ نے بنایا؟ اگر نہیں، تو پھر ہماری محبت کا کیا مطلب؟

بارہ ربیع الاول کا پیغام یہ ہے کہ ہم اپنے آپ کو بدلیں۔ ہم اپنے گھروں کو بدلیں۔ ہم اپنے معاشرے کو بدلیں۔ ہم وہ روشنی بنیں جو آپ صلی اللہ علیہ وسلم لے کر آئے تھے۔

آئیے، آج ہم عہد کریں کہ ہم صرف زبانی محبت تک محدود نہیں رہیں گے۔ ہم عمل سے ثابت کریں گے کہ ہم سچے عاشقِ رسول ہیں۔ ہم علم سیکھیں گے، علم سکھائیں گے۔ ہم محبت پھیلائیں گے، نفرت نہیں۔ ہم اتحاد قائم کریں گے، اختلاف نہیں۔ ہم رحمت بنیں گے، زحمت نہیں۔

بارہ ربیع الاول کا پیغام یہی ہے کہ ہم سب مل کر ایک ایسا پاکستان بنائیں جو علم کا، محبت کا، اور امن کا پاکستان ہو۔ جہاں ہر کوئی خوش ہو، جہاں ہر کوئی محفوظ ہو، جہاں ہر کوئی عزت کی زندگی جی سکے۔ یہی اس عظیم ہستی کا پیغام ہے، جس نے دنیا کو امن کا، محبت کا، اور علم کا راستہ دکھایا۔ آئیے، آج اس پیغام کو صرف منائیں نہیں، بلکہ اپنی زندگیوں میں اپنائیں۔ تبھی ہمارا آج اور ہمارا کل سنورے گا۔

یہی 12 ربیع الاول کا پیغام ہے۔ یہی محبت کا تقاضا ہے۔ یہی انسانیت کی فلاح ہے۔ یہی ہمارے ملک اور قوم کی نجات ہے۔

اللہ ہم سب کو سیدھے راستے پر چلنے کی توفیق دے۔ آمین۔