میں کیوں سوری بولوں؟

 میں کیوں سوری بولوں؟

کالم از: سر جاوید بشیر

میں نے بچپن میں سنا تھا، "غلطی انسان سے ہی ہوتی ہے۔" مگر یہ بات ادھوری تھی۔

اصل جملہ یوں ہونا چاہیے تھا، "غلطی انسان سے ہوتی ہے، اور عظمت اُس انسان کی ہوتی ہے جو اپنی غلطی مان لیتا ہے۔"

یہ حقیقت ہے کہ کوئی بھی انسان غلطی سے پاک نہیں۔

مگر اصل مسئلہ یہ نہیں کہ ہم غلطیاں کرتے ہیں، اصل مسئلہ یہ ہے کہ ہم اپنی غلطی کو تسلیم نہیں کرتے۔

ہم اپنی انا، ضد اور خود پسندی کے قیدی بن کر رہ جاتے ہیں۔

اور یہی ضد یہی انا ہماری زندگیاں برباد کر دیتی ہے،ہمارے رشتے توڑ دیتی ہے، اور ہمارے دلوں کو سخت کر دیتی ہے۔

یہ دنیا صرف "سوری" نہ کہنے کی وجہ سے

ویران دلوں اور ٹوٹے رشتوں سے بھری پڑی ہے۔

ہزاروں گھروں کی دیواروں میں آج بھی

ایک نہ کہا گیا “سوری” گونج رہا ہے۔

یہ وہ لفظ ہے جو بول دیا جاتا تو شاید نہ کوئی گھر ٹوٹتا،نہ کوئی دل اداس ہوتا، نہ کوئی آنکھ نم رہتی۔

“سوری” ایک چھوٹا سا لفظ ہے، لیکن اس میں بے پناہ طاقت ہے۔

 “سوری” صرف پانچ حروف کا لفظ ہے، لیکن اس کے اندر انسانی رشتوں کو زندہ کرنے کی طاقت ہے۔ یہ زخموں پر مرہم رکھتا ہے، یہ دلوں کو نرم کرتا ہے، یہ فاصلے مٹاتا ہے، اور سب سے بڑھ کر یہ انا کو توڑتا ہے۔

 مگر ہم یہ لفظ بولنے سے کیوں گھبراتے ہیں؟ کیوں ہمیں لگتا ہے کہ “سوری” بولنے سے ہماری عزت کم ہو جائے گی؟

کیا معافی مانگنا واقعی کمزوری ہے؟

یا یہ ہمارے اندر چھپی ہوئی جھوٹی انا کا نتیجہ ہے؟

ہم میں سے اکثر لوگ اس لیے “سوری” نہیں کہتے کیونکہ ہمیں اپنی انا سے بہت محبت ہے۔

ہم سمجھتے ہیں کہ اگر ہم نے معافی مانگ لی

تو ہم ہار جائیں گے۔ حالانکہ حقیقت یہ ہے کہ

“سوری” کہنے والا کبھی نہیں ہارتا، وہ جیت جاتا ہے، دلوں کو جیت لیتا ہے۔

یہی انا ہے جو شوہروں کو بیوی سے “سوری” بولنے سے روکتی ہے،

یہی انا ہے جو بیوی کو اپنے شوہر کے سامنے نرم نہیں ہونے دیتی،

یہی انا ہے جو والدین اور اولاد کے درمیان فاصلہ بڑھاتی ہے۔

ہم سب اپنے دل میں جانتے ہیں کہ غلطی ہماری تھی، مگر ہم “میں کیوں سوری بولوں؟” کے شکنجے میں پھنسے رہتے ہیں۔

ہمارے گھروں میں، ہمارے تعلیمی اداروں میں

بچوں کو یہ نہیں سکھایا جاتا کہ غلطی ماننا بہادری ہے۔ بلکہ ہمیں یہ سکھایا جاتا ہے کہ

“ہمیشہ اپنی بات پر ڈٹے رہو” چاہے وہ بات غلط ہی کیوں نہ ہو۔

یہی ضد، یہی تربیت وقت کے ساتھ انا میں بدل جاتی ہے۔ اور پھر ہم بڑے ہو کر “سوری” سے دور ہو جاتے ہیں۔

ہم سمجھتے ہیں کہ اگر ہم نے “سوری” کہہ دیا

تو سامنے والا جیت جائے گا۔ ہم یہ بھول جاتے ہیں کہ رشتہ کوئی جنگ نہیں ہوتا جہاں ایک جیتے اور دوسرا ہارے۔ رشتہ وہ بندھن ہے جہاں دونوں کی جیت ہوتی ہے۔

بعض لوگ “سوری” اس لیے نہیں بولتے

کیونکہ وہ اندر ہی اندر دوسرے سے ناراضی پال لیتے ہیں۔ انہیں لگتا ہے کہ اگر وہ معافی مانگ لیں گے تو ان کے اندر کا غصہ ختم ہو جائے گا۔ اور شاید وہ یہی نہیں چاہتے۔ وہ اپنی “خاموش دشمنی” سے ایک عجیب سا سکون محسوس کرتے ہیں، جو دراصل ان کے دل کو اندر سے کھوکھلا کر رہا ہوتا ہے۔

“سوری” بولنا کمزوری نہیں، یہ تو اپنی انا کو شکست دینے کا سب سے خوبصورت عمل ہے۔

جو شخص اپنی غلطی مان لیتا ہے، وہ دراصل اپنے اندر کے بڑے پن کا ثبوت دیتا ہے۔

حضرت علی کا قول ہے:

"جو اپنی غلطی تسلیم کر لیتا ہے،

اللہ تعالیٰ اس کی عزت میں اضافہ فرما دیتا ہے۔"

سوچئے، اگر “سوری” کہنے سے

آپ کی عزت اللہ کے نزدیک بڑھتی ہے، تو پھر یہ لفظ نہ کہنے کی وجہ کیا ہے؟

جب آپ “سوری” کہتے ہیں، تو آپ صرف دوسروں کو سکون نہیں دیتے، بلکہ آپ خود کو بھی آزاد کرتے ہیں۔ دل میں جو بوجھ، جو گِلہ، جو شرمندگی بیٹھ جاتی ہے، وہ ایک سچے “سوری” سے ختم ہو جاتی ہے۔

“سوری” صرف زبان سے نہیں، دل سے نکلنی چاہیے۔ یہ لفظ جب خلوص کے ساتھ بولا جاتا ہے، تو سامنے والا چاہے کتنا ہی سخت دل کیوں نہ ہو، پگھل جاتا ہے۔

 خلوص سے بولیں، “مجھے افسوس ہے کہ میری بات سے آپ کو دکھ پہنچا”

“مجھے احساس ہے کہ میری حرکت سے آپ کو تکلیف ہوئی۔”

یہ کہنا کہ “میں آئندہ خیال رکھوں گا”

بڑا اعتماد پیدا کرتا ہے۔ یہ رشتہ دوبارہ مضبوط کر دیتا ہے۔

ہم ایک ایسے معاشرے میں رہتے ہیں جہاں لوگ جھگڑنے میں جلدی کرتے ہیں مگر ماننے میں نہیں۔ ہم چھوٹی باتوں کو انا کا مسئلہ بنا لیتے ہیں۔

دو بھائی جھگڑے میں برسوں ایک دوسرے سے بات نہیں کرتے۔

پڑوسی ایک دیوار کے سائے پر دشمن بن جاتے ہیں۔

خاوند بیوی سے معمولی بات پر الگ رہنے لگتا ہے۔ اولاد والدین سے رنجیدہ ہو جاتی ہے،

اور والدین بیٹے یا بیٹی سے بات چیت ختم کر دیتے ہیں۔ اور افسوس کی بات یہ ہے کہ ان تمام رشتوں میں صرف ایک لفظ سب کچھ بدل سکتا تھا ، “سوری”

 

دوسروں کو معاف کرنے والا، اور اپنی غلطی پر جھکنے والا، اللہ کے نزدیک سب سے زیادہ محبوب ہے۔ یہ وہ لوگ ہیں جو اپنے دل میں نرم گوشہ رکھتے ہیں، جو دوسروں کی تکلیف کو سمجھتے ہیں۔

میں نے خود دیکھا ہے، ایک شخص جو برسوں اپنی ماں سے ناراض رہا، صرف ایک چھوٹی سی بات پر۔

ماں دنیا سے چلی گئی،

اور بیٹا آج بھی قبر پر جا کر روتا ہے۔

وہ کہتا ہے: “کاش میں ایک بار کہہ دیتا امی، سوری۔”

یہ لفظ اب اس کے دل میں دفن ہو چکا ہے،

اور شاید قیامت تک اسے سکون نہ ملے۔

ایک لمحہ سوچئے…

کیا آپ کے دل میں کوئی ایسا شخص نہیں

جسے آپ نے تکلیف پہنچائی ہو؟

کوئی ایسا رشتہ نہیں جو آپ کی خاموشی کی وجہ سے دور ہو گیا ہو؟

آپ کے پاس اب بھی وقت ہےکہ آپ جا کر کہہ سکیں "مجھے افسوس ہے، میں نے غلطی کی تھی۔"

کیونکہ "سوری" کہنے میں دیر کر دینے سے

کبھی کبھی پوری زندگی پچھتاوا بن جاتی ہے۔

زندگی بہت مختصر ہے۔ رنجشوں، ضدوں اور انا میں اسے ضائع نہ کریں۔

آج جسے آپ ناراض چھوڑ رہے ہیں، شاید کل وہ دنیا میں نہ ہو، یا آپ نہ رہیں۔ “سوری” کہنے سے نہ صرف آپ رشتہ بچاتے ہیں، بلکہ اپنی روح کو بھی سکون دیتے ہیں۔

اللہ ہمیں وہ بڑا دل عطا فرمائے جو غلطی پر جھکنا جانتا ہو اور دوسروں کو معاف کرنا بھی۔

یاد رکھیں، “سوری” کہنا آپ کو چھوٹا نہیں کرتا، یہ آپ کو عظیم بنا دیتا ہے۔ جو “سوری” کہتا ہے، وہ کبھی نہیں ہارتا، وہ جیتتا ہے، دل اور رب دونوں۔

میں آپ سے ایک بات دل سے کہتا ہوں،

اگر آج آپ کے دل میں کسی کے لیے ناراضی ہے،

اگر آپ نے کسی کو دکھ دیا ہے، اگر آپ جانتے ہیں کہ آپ نے زیادتی کی تھی،

تو ابھی، اسی وقت، فون اٹھائیں،

یا جا کر اس کے سامنے بیٹھ جائیں، اور کہیں،

"مجھے افسوس ہے۔ میری غلطی تھی۔" آپ دیکھیں گے، سامنے والا حیران رہ جائے گا۔

پھر اس کےدل میں نرمی آ جائے گی۔

پھر آپ دونوں کے بیچ وہ

 خاموشی ٹوٹ جائے گی جو سالوں سے بولنے نہیں رہی تھی۔

یہی لمحہ اصل زندگی ہے۔

یہی لمحہ اصل جیت ہے۔