Larky bany Larkiyan, TikTok ke Likes aur Hamara Noujwan

 

اقبال کے شاہین اور ٹک ٹاک کے سپاہی

A Column By: سر جاوید بشیر

 یہ کہانی ہے "طارق بن زیاد" کی۔ وہی نوجوان سپہ سالار جس نے 711 عیسوی میں ایک چھوٹے سے لشکر کے ساتھ جبرالٹر کی پہاڑیوں پر کھڑے ہو کر کشتیاں جلا دیں اور اپنے سپاہیوں کو کہا ’’واپسی کا کوئی راستہ نہیں، یا تو جیت کر آگے بڑھنا ہے یا پھر شہید ہو کر تاریخ میں زندہ رہنا ہے‘‘۔ اُس وقت بھی نوجوان تھے، خواب بھی تھے، تمنائیں بھی تھیں، زندگی کی بہاریں بھی تھیں، لیکن ان کے مقصد اونچے تھے۔ وہ اپنی زندگی کو لائکس اور فالوورز کی بھیک میں ضائع نہیں کرتے تھے، وہ تاریخ پر نقش چھوڑتے تھے۔

اور آج ہمارا نوجوان؟ وہی جو کل والدین کے لیے خوشیوں کا سامان تھا، جس کی پیدائش پر دعائیں کی گئی تھیں، آج TikTok کی سکرین پر لڑکی کا لباس پہن کر، لپ اسٹک اور رنگوں میں غرق ہو کر ہاتھوں کو مٹکاتا ہے، کمروں میں ٹھمکتا ہے، اور پھر اس پر ’’لائکس‘‘ اور ’’کمنٹس‘‘ کی بارش دیکھ کر سمجھتا ہے کہ اُس نے دنیا فتح کر لی ہے۔ یہ ہمارا سفر ہے، یہ ہماری تباہی کا نشان ہے: ایک عظیم قوم سے ایک ’’کرنج‘‘ قوم بننے کا۔

اصل دکھ یہ ہے کہ یہ صرف لڑکے نہیں، ہماری لڑکیاں بھی ہر حد پار کر چکی ہیں۔ جنہیں کل ماں اور بہن کی پہچان کہا جاتا تھا، آج وہ بھی اپنے آپ کو ایسی دلدل میں گرا رہی ہیں جہاں پردہ، حیاء، شرم سب مزاق کا موضوع بن چکے ہیں۔ یہ سب کچھ ہو رہا ہے ایک اسکرین، ایک لائک، ایک ویو کے بدلے میں۔ اور ہم نے یہ طے کر لیا ہے کہ اپنی پہچان، اپنے اقدار، اپنے معاشرتی اصول سب قربان کر دیں گے، بس ہمیں اُس ایک ورچوئل تعریف کی بھیک چاہیے۔

یہ سفر اتنا ہی افسوسناک ہے جتنا کہانی کسی ایسے شہزادے کی جو اپنی پوری سلطنت ایک کھلونے کے بدلے بیچ دے۔ ہم بھول گئے ہیں کہ سرزمین کو کتنی قربانیوں سےحاصل گیا، کس طرح لاکھوں لوگوں نے اپنی جانیں دیں، اپنی عزتیں قربان کیں تاکہ پاکستان کے نوجوان آزاد فضا میں سانس لے سکیں۔ اور آزادی کے اُس تحفے کو ہم TikTok کے شارٹ ویڈیوز میں ضائع کر رہے ہیں۔  

میں یہ نہیں کہتا کہ تفریح غلط ہے، یہ بھی اصل انسانی ضرورت ہے۔ لیکن تفریح اور تہذیب کا بیڑہ غرق کرنا دو الگ چیزیں ہیں۔ آج کا نوجوان جب سوشل میڈیا کی لت میں ڈوبتا ہے تو وہ یہ نہیں دیکھتا کہ وہ خود کو کس تماشے کا حصہ بنا رہا ہے۔ وہ دیکھتا ہے کہ کس کی ویڈیو زیادہ وائرل ہوئی، کس نے زیادہ لائکس لیے، کس پر زیادہ ’’کمنٹس‘‘ آئے، لیکن وہ یہ نہیں سوچتا کہ اُس کی ویڈیو کے بعد اُس کے خاندان، اُس کے محلے، اُس کے دوست اُس پر کیسے تبصرے کر رہے ہیں۔ لائکس کی بھوک نے ہماری عزت نفس کھا لی ہے۔  

اُس دور کے نوجوان نے تاریخ بدلی، آج کے نوجوان نے جگر ٹکڑے ٹکڑے کر دیے۔ فرق یہ ہے کہ اُس دور میں ایک نوجوان کا مقصد اُمت کا عروج تھا، آج کا مقصد صرف خود کو ایک کمرے میں کیمرے کے سامنے مختلف حلیوں میں دکھانا ہے۔ کل باپ اپنے بیٹے پر فخر کرتا تھا، آج وہ بیٹے کی ویڈیوز دیکھ کر سر جھکا لیتا ہے۔ یہ صرف ایک بیٹے یا ایک لڑکی کی بدنامی نہیں بلکہ پورے خاندان میں شرمندگی کا باعث ہے۔ ہماری جڑیں کاٹ دی گئی ہیں، ہمیں اپنی پہچان کا پتہ ہی نہیں رہا۔  

سوال یہ ہے کہ آخر ہم یہ سب کر کیوں رہے ہیں؟ اس کا ایک جواب ہے۔ ناکامی! ہمارے تعلیمی ادارے ہمیں وہ اعتماد نہیں دے سکے کہ ہم اپنی اصل پہچان کے ساتھ دنیا جیت سکیں۔ روزگار کے مواقع نہ ملنے، خواب ٹوٹنے اور ناکام معاشرتی ڈھانچے نے ہماری نوجوان نسل کا دماغ تباہ کر دیا ہے۔ ایسے حالات میں جب ایک لڑکا یا لڑکی چھوٹی سی ویڈیو کے بدلے ہزاروں لوگوں کے لائکس دیکھتا ہے تو اُسے ایک مصنوعی خوشی ملتی ہے، اُسے لگتا ہے کہ اُس کی اہمیت ہے، چاہے یہ خوشی کتنی ہی کھوکھلی کیوں نہ ہو۔ لیکن یاد رکھو، مصنوعی خوشی کبھی حقیقی سکون نہیں لا سکتی۔  

معاشرہ تباہی کی اُس نہج پر کھڑا ہے جہاں تاریخ ہمیشہ معاف نہیں کرتی۔ جب قومیں اپنی اقدار بیچ دیتی ہیں تو وہ کبھی زندہ نہیں رہتیں۔ روم جیسی عظیم سلطنت گرتی ہے تو وجہ اُس کا عیاش نوجوان طبقہ ہی بنتا ہے۔ بغداد جلتا ہے تو اس کے پیچھے بھی عیاشی اور اخلاقی تنزلی چھپی ہوتی ہے۔ نوجوان میدانوں میں سے نکل کر عیاشی کی محفلوں میں داخل ہو جاتے ہیں۔ آج پاکستان کا بھی یہی حال ہے۔ ہم نے اپنے موبائل کی اسکرین پر مصنوعی تالیوں اور جعلی واہ واہ کو اپنا مقصد بنا لیا ہے۔  

لیکن دنیا کا اصول ایک ہے۔ جب قومیں اپنی پہچان چھوڑتی ہیں، تو دنیا اُنہیں دھکے مار کے تاریخ کے کچرے دان میں پھینک دیتی ہے۔ سوال یہ ہے کہ کیا ہم واقعی اس مقدر کے حقدار ہیں؟ کیا یہ وہی قوم ہے جسے اقبال نے شاہین کہا تھا، یا یہ وہی قوم ہے جسے قائداعظم نے کہا تھا کہ ’’دنیا کی کوئی طاقت پاکستان کو ختم نہیں کر سکتی‘‘؟ کیا یہ وہی خواب ہے جو ایک برصغیر کے مسلمانوں نے دیکھے تھے؟ یا پھر یہ ایک ڈراؤنا خواب ہے جس میں ہم نے اپنے بچوں کو بدل دیا ہے ایک ایسے مہرے میں، جو صرف لائکس کے پیچھے نا چ رہے ہیں، اچھل رہے ہیں اور اصل زندگی بھول رہے ہیں۔

 کشتیاں جلا کر نکلنے والے جوان کبھی شکست نہیں کھاتے۔ لیکن جو اپنی پہچان بیچ کر لائکس کی بھیک مانگتے ہیں، وہ کبھی جیت نہیں سکتے۔ پاکستان کو ضرورت ہے نئے طارق بن زیاد کی، نئے صلاح الدین کی، مگر ہم پیدا کر رہے ہیں ’’ٹک ٹاک سپاہی‘‘، جو میدان جنگ میں نہیں بلکہ سکرین پر لائکس کے پیچھے مر رہے ہیں۔  

اب بھی وقت ہے۔ اپنی پہچان پہچانو، اپنے خواب سنبھالو، اپنے والدین کے اعتماد کو سمجھو۔ قوم کا مستقبل تمہارے ہاتھ میں ہے۔ اگر تم اپنی پہچان کو بگاڑو گے تو یاد رکھو، آنے والی نسلیں تمہیں معاف نہیں کریں گی۔  

یہی سوال ہمارے سامنے ہے: ہم ایک عظیم قوم سے آخر کتنی تیزی کے ساتھ ایک کرنج قوم بن رہے ہیں؟ اور اگر ہم نے رکنے کا فیصلہ نہ کیا تو آنے والی تاریخ ہمیں وہی مقام دے گی جو کبھی تباہ ہونے والی قوموں کو ملا۔   

تو سوال یہ ہے: ہم کہاں کھڑے ہیں؟ کیا ہم اپنے نوجوانوں کو اس دلدل سے نکال کر ایک نئی سمت دے سکتے ہیں؟ آپ اس صورتحال کے بارے میں کیا سوچتے ہیں، اور اس مسئلے کا حل کیا ہو سکتا ہے؟ اپنی قیمتی رائے ضرور دیں۔